Swala ya Kuomba Mvua

Maana ya Swala ya kuomba Mvua

Dalili ya Usheria wa Swalah ya Kuomba Mvua

Swalah ya kuomba mvua ni sunnah iliyotiliwa mkazo kwa kitendo cha Mtume ﷺ, kama ilivyo kwenye hadithi iliyopokelewa na Abdullah bin Zaid t kwamba Mtume ﷺ alitoka kwenda kwenye kiwanja cha kuswali akaomba mvua, akaelekea Kibla, akageuza kishali chake na akaswali rakaa mbili) [Imepokewa na Bukhari na Muslim.].

Wakati wa Swala ya Kuomba Mvua

Wakati uliowekwa na Sheria wa Swala ya kuomba mvua ni ardhi inapokuwa kavu na mvua kutonyesha, au yanapokuwa machache maji ya chemchemi na visima, au mito ikakauka na mfano wake. Inapendekezwa ifanyike baada ya jua kuchomoza na kufikia kadiri ya mkuki na wakati huo kwa kiasi ni baada ya kuchomoza jua kwa dakika ishirini kama vile Swala ya Idi.

Mahali pa kuswali Swalah ya Kuomba Mvua

Lililo la sunna ni iswaliwe uwanjani na sio msikitini, kwa hivyo ndivyo alivofanya Mtume ﷺ isipokuwa kwa dharura.

Namna ya kuswali Swala ya Kuomba Mvua

1. Swala ya Kuomba Mvua ni rakaa mbili, bila ya kuadhini wala kukimu, na kisomo katika rakaa mbili hizo huwa ni kwa sauti.

2. Mwenye kuswali katika rakaa ya kwanza atapiga takbiri saba baada ya ile takbiri ya kufungia Swala. Na katika rakaa ya pili atapiga takbiri tano, mbali ya ile takbiri ya kuinuka kutoka kwenye sijida.

3. Mwenye kuswali atainua mikono yake katika kila takibiri, atamhimidi Mwenyezi Mungu na kumsifu na atamswalia Mtume ﷺ baina hizo takbiri.

4. Baada ya kuswali imamu atahutubu hutuba moja, atakithirisha kuomba msamaha na kusoma Qur›ani katika hiyo hutuba. Kisha ataomba kwa wingi dua zilizopokewa, pamoja na kukariri na kurudia maombi na kuonyesha unyonge, uhitaji na umasikini kwa Mwenyezi Mungu aliyetukuka, na ainuwe mikono yake upeo wa kuinua.

5. Imamu ataelekea Kibla, atageuza kishali chake, kilicho kuliani akiweke kushotoni na kilicho kushotoni akiweke kuliani, na ataendelea kuomba baina yake yeye na Mola wake.

Miongoni mwa hukumu za Swalah ya Kuomba Mvua

1. Itanguliwe na mawaidha na kuwakumbusha watu yale yatakayolainisha nyoyo zao kwa kutaja kutubia kutokana na maaswia na kujisafisha na dhuluma kwa kuwarudishia watu haki zao, kwani maaswia ni sababu ya kuzuiliwa mvua, na kutubia, kuomba msamaha na kumcha Mwenyezi Mungu ni sababu ya kukubaliwa dua na ni sababu ya kupata kheri na baraka. Awahimize wao kutoa sadaka, kwani utoaji sadaka ni sababu ya kupata rehema.

2. Imamu aiweke siku ya kutoka kwenda kuswali, ili watu wajitayarishe kwa hiyo Swala.

3. Imesunniwa kutoka kwenda kuswali kwa unyenyekevu, utiifu, unyoge na kujidhalilisha pamoja na kuonyesha uhitaji kwa Mwenyezi Mungu. Kwa hivyo Swala hiyo haikuwekewa kujitengeza na kujitia manukato kwa ajili yake. Ibnu ‘Abbas t amesema katika kusifu kutoka kwa Mtume ﷺ kwenda kuomba mvua: (Hakia Mtume wa Mwenyezi Mungu ﷺ alitoka akiwa amevaa nguo takavu [ Almutabadhdhil: Anayeacha pambo na vazi zuri], hali ya kunyenyekea na kujidhalilisha mpaka akafika mahali pa kuswali) [ Imepokewa na Abu Daud.]

4. Kutaka msamaha na kuomba dua kwa wingi pamoja na kuinua mikono katika hutuba ya Kuomba Mvua.

Linalopendekezwa wakati mvua inaponyesaha

Inapendekezwa, mvua inaponyesha kwa mara ya kwanza, kusimama na kujitia mvuani, kwa kuwa Mtume ﷺ alifanya hivyo katika hadithi iliyopokewa na Anas t akisema: (Tulinyeshewa na mvua na sisi tuko na Mtume wa Mwenyezi Mungu ﷺ. Asema: Mtume ﷺ akafunua nguo yake mpaka mvua ikampiga. Tukasema: ”Ewe Mtume wa Mwenyezi Mungu! Kwa nini umefanya hivo?” Akasemaﷺ kwa kuwa imepitiwa na muda mchache kutoka kwa Mola wake”) [Imepokewa na Muslim.].